127

   上年實在過得很差,過年時入院,睇歐國盃250搏到12碼時收到噩耗,蘋xxxxxxx,1023尚差7日達達就20大壽但衰仔急住去天堂搵老豆,還有無數單令人xxxxxxxxx,唔識講,完.

  今日本來係一年中xxxxx.

從前從前爸爸(2)

   爸爸走咗3年,有啲嘢要接受,甚至諒解,但絕不會原諒,以前我成日講(做),扮冇嘢扮吓扮吓會真係變冇嘢,除非真係鉻心刻骨,予我來說,曾經有一件無論幾多年都係有嘢,希望呢單係第二件.

  和爸爸相處咁多年,冇咩嘢大道理教過我,只有身教,都係唔講咁複雜住,講啲濕9小事先:細過你用藤條,烏蠅拍打我係從不手軟,欠功課默書唔合格就梗,中學時有朝唔食你煮嘅粥(細個唔食粥,加上是怪9料理......),你打到我赤腳走出街逃避;小學時手冊爸爸職業係寫藝術家,重留一撇鬚;家長日你嚟到唔排隊直接開門入房;中學時你經常周圍飛,一年在港都唔知有冇幾十日,有次我喺停車場對牆踢波你返屋企撞到帶咗我去八百伴買架單車;好細個有晚你帶我去觀塘食麵;人人笑你係天生老細成世未打過工;你"退休"後用了很多時間研究六合彩,有次睇報紙話元朗投注站旺,你之後就成日山長水遠車埋我一齊去元朗為的就是買六合彩;你有段時間成日唱首英文歌,我重未搵得返;你會經常打去18503(聽天氣),為的是聽報天氣前的廣告說"只要有夢想,凡事可成真",聽完你會笑笑口講返出嚟;你有個動作成日做成日自己喺度笑,攤開雙手一字腳一步一步行,我至今唔知笑乜......

瞓覺

  尋晚瞓得超差,十點幾瞓著之後12,2,4,6點都起一起身,12點照舊俾屎忽鬼嘈醒,之後到2點期間發嘅夢罕有地有爸爸同她的出現,夢見衰仔妻又瀨尿,我攞咗爸爸件衫去印乾啲尿,呢次係五個月以嚟再夢見爸爸......之後到她,唔記得夢到咩,只記得關於以前好興去影閃卡嘅其中一張,2點我係傷心而醒,簡直有斷腸感覺,之後再瞓返啲夢居然接得住,係個個都接得住,至到6點,傷心到6點......
  近年我最大轉變係夜晚叫做瞓到吓覺,最神奇係,我居然瞓到晏覺,由細到大,除咗病,我一瞓晏覺,哪怕只是區區半粒鐘,醒返之後都會頭痛暈陀陀.全日就始報銷,所以除咗夜晚係唔會瞓(但搭巴士我就會好好瞓之餘重要冇事,你話我幾咁賤格),原因可能係老咗同埋近年冇做虧心事,完.

my way

  有啲嘢,就算心照/明知/估到/100%都好,只要未確認,就總是有不同......我實在估不到那"不同"是天同地比......和我同月同日出生的舊同事大婚之喜,fb上有啲唔知乜鬼邀請,屎忽痕入去睇,睇吓睇吓去了按她的......大頭相換了b相,再搵搵吓見埋一家三口幸福相,震撼到唔識講,唔識點講,唔知講咩,或許祝福前要先奉上那句埋藏多年的對不起,又或慳x啲係最正確......九月中的事,那刻才省起我忘記了8月,2011以來首次忘記...返工嗰度好多人話我好好人,讚我其他還可以,讚呢樣實在受唔落,11年後我決心改變,大大小小都變吓,多年下來,極其量只係講嘢少咗,口材差咗,個樣老咗好多,本質可能都一樣咁x,狗改不了吃屎嘛...說盡了,以後不說了,點扮嘢,點偽善,說她的(感覺)都100%是真.
  還有,我結了婚.

神經

  又夢見你,和你一起看窗外景色,唔記得睇咩咯,只記得對你不起,我抱怨如果喺嗰段時間(?)復合就好......還有夢見老豆,又係唔記得發生過乜,仲夢見我中百三萬六合彩,no.好似記得但又唔肯定......
  早排參加金鴨(咸蛋魚皮,新加坡平嗰隻)睇波活動,嬴咗可以去睇波,我諗現場可以任食,走嗰陣應該有幾包攞,名副其實又食又拎,但最後居然係記錯日子去唔成,我居然會記錯日子......
  阿媽嚟香港兩星期,已過咗一星期,完!

夢中見一千零一回

  尋日陰差陽錯之之佐佐連鎖蝶變搞到冇買嗰場波,當然中到應一應,火都嚟埋谷鬼氣,之後又發作恍恍惚惚唔知做乜,睇完波蘭對塞內加爾就嬲爆爆去瞓,想不到夢到你......夢中,我約咗個女仔喺沙田街市前橋底等,我踩單車去,離遠見到個女仔,眼尾卻瞄到附近有個背影非常熟悉,特登兜去正面,果然是你,你的前蔭電攣了,整個人曬黑了,我踩去約個女仔前面冇停低拋下一句轉頭搵你就去見你,閒話家常(唔記得講乜)意會到原來你等緊我,仲等咗幾年,開心到我呢(真係好耐未試過咁開心,快樂)......鏡頭一轉你係第一身,同人講返,話你同我傾偈時我係咁望約咗嗰個女仔云云,所以走咗(大意),跟住你俾人鬧(大意),你決定搵返我......之後我醒咗,好努力想再瞓返接返個夢,當然徒勞無功......
  今屆世界盃是我懂性以來首次沒有爸爸陪我一齊睇......但我有薯片陪我,今年買嘅薯片都算多,買咗三四百蚊全部薯片芝士條之類(卡樂b珍珍嗰啲平嘢咋所以有勁多包,),另外汽水又買咗好多(之前戒緊),咁好準備才發現一樣嘢,今年我嬴多輸好少,輸嗰幾場咁啱我都有食薯片飲汽水.......真係大整古,更大整古係,申請咗高清世界盃,點知電視壞咗,要喺個細電視睇,真係把x.

原來原來爸爸......

  睇戲嘅主角嘅老豆通常都有啲格言呀家訓呀座右銘之類留低,我爸爸係冇嘅,鬧人嘅口頭禪同啲舊衫褲就大把,錢唔知點講,由我保管張提款卡嗰幾個月一蚊都冇攞過,由第2個人保管就光束花光......
  細細個,好興人咃一問候娘親就反枱甚至開拖,我反而俾人鬧我老豆先會扯火,但當時我係親阿媽多好多,記憶中老豆成日周圍飛,到全家人各散東西得我同佢兩個住,佢都會一聲唔該去美國幾個月(經常添)......我同佢嘅關係照計應該幾好,因為成世人陪佢最長時間嘅人係我,陪我最長時間嘅人係佢(得我冇出國留學),平時又嘻嘻哈哈好fd咁款,雖然不嬲知佢偏心兩位哥哥但都係好正常,直到到我出事,佢竟然......我係憎到入骨,後來忽然變老,再老人痴呆,我先冇嘢......
  佢冇嘢留低,接近成世冇同我認真傾過或傾過認真嘢,呢排我先發現,原來佢影響我都幾深,最似佢應該係我:終日狀似嬉皮笑臉永遠唔認真,講嘢冇內容剩係串串貢或講笑,自大,懶過x,愛發白日夢,睇錢大過天但又理財不善,易受騙......我又冇好似其他人咁後悔以前冇對佢好啲之類,但,在心中.