二不離三

  向來喜歡/重視球員多過球隊,所以會追隨心儀球員一起轉會(甚至轉國),沒有特定死硬喜歡死一隊波(講開從來唔覺勝利球迷有唔妥(乞人憎咀臉/言論另計),死忠一隊波亦唔特別馨香(自覺高人一等與別不同另計)),反而國家隊有兩支心頭好,撐咗好耐,一隊是港人又愛又恨的英格蘭,另一隊是已不再存在的南斯拉夫......球星近年我是美斯迷,天份不用多說,少年得志後還繼續求進,入球能力,毒辣傳送,射罰球,講到呢度都眼濕濕,陰公豬,慘慘豬,先是克羅地亞(南斯拉夫分裂後兩大足球勢力之一)苦戰百二分鐘被絕殺,戰情極度心up,優勝劣敗的話會好過啲......之後朝早,總差一點點的美斯......今次晉級過程比1415兩次決賽更有說服力,美斯表現變回巴塞的美斯,但總是差一點點,冇射手?應屆破紀錄意甲神射手球單刀處理之差令人O咀再粗暴硬闖令壽堂,派牌球員好不了以前防中加高多少,具相當質素的阿古獸狀態比14年好,只是分別在於當年得一成今年有五成狀態,看著美斯初時從容後尾多次咬實牙關明知不可為也強行突圍,再到射失12碼(馬勒當拿柏天尼尹巴斯頓史杜高域巴治奧華度......),同一晚,英格蘭對冰島,如果是歐國盃前對壘,考慮的是全場主其他吧?學神有好多錯,最錯係冇選安德魯卡魯爾入選,這一選擇反映學臣自視極高,從來英格蘭都被高估,想不到領隊都高估自己隊波.......我捧的克羅地亞,阿根廷,英格蘭全部玩完,我可以專心賭波,決賽組合買意大利對比利時,補條冠軍法國,而家呢個階段邊隊捧盃都唔會特別高興,BUT,如葡萄牙德國下輪返歸我會咀角向上.

講嘢

  今朝睇完比利時對意大利(因為瞓過籠冇買到,呢啲情況必然結果係:冇買就嬴),5點幾再瞓,8點9再起身睇波美洲盃,呢兩個鐘之內醒過1次好彩可以再瞓返,想講嘅係發嗰兩個夢.......(最後先再講),講吓波先,美洲盃巴西出局實在開針,原因係印證了我之前預測,睇死原因係呢隊(指近兩三年)巴西係所見過最差嘅巴西(早於14年前已經咁講),仲要係喺最差嘅一隊中未有夫添出戰,焉能不早早下馬?認完叻講吓趺眼鏡,對兩隊波頗失望,比利時同哥倫比亞,2年前睇世盃見兩隊都爭一點點,認為過多排應會曉飛(尤其後者),兩年後,居然分別不大,比利時多了我好喜歡嘅迪布尼都踢到1盆散沙,換咗領隊都係咁,看上去球星如雲,踢落就......希望只係第1場踢唔出水準吧,夏神我本覺得有條件接到恩尼斯達班,傳送比不上希望隨年紀增長會有進步,最要改係減少盤扭,唔好扭到死先肯交(雖然有時扭到死咗但又交出球唔錯嘅傳送吹佢唔漲).......長氣咗少少,講吓支持邊隊,係盲忠咁撐,英格蘭+克羅地亞.

  講返個夢,值得講當然係夢見她,以下是兩個夢加埋......本已混亂,加上忘記了,小心看.我戴住眼鏡踩啲好貼地瞓喺度踩嘅類似單車專登經過她常出沒(夢中意識)的茶記,隔咗玻璃門見到她,我來來回回引她注意,她發現了我,行出嚟同我講嘢,我問:你仲未讀完書?......她陪我行一段路,我拖著她的手,但不是男女朋友關係,問她:可唔可以再同我一齊(大意)?忘記了大部份,只記得夢中總結感覺是她好好(恕我用啲咁貧乏嘅形容)......完咗啦,哈哈,夢中見到她開心得要命,現實中一想起她,難過/心痛得要死.

心碎

  聽到心都碎了......

  昨晚夢見"她",夢入面最後我拖實她的手問:我哋係咪即係復合?她應允,我大喜,但隱隱有啲唔妥......已經返唔到轉頭?......I don't wanna talk about it......

  3月開始我在樓下返兼職,終於領略到行返工唔使五分鐘嘅爽法,份工搬搬抬抬1做運動幾好,短短一個月皮帶已經扣小1格
......同埋,我唔係得閒先掛住她,工作中都會......

今日

  以前每年今日,係一年裡頭最重要的一日,如今,變為最xx的一日.
  唔話當年,講吓戲,"我的少女時代"(好想好想好想係同你一齊睇)係我好鍾意嘅戲(咁講係好唔型,同識我嘅人講通常得番嚟嘅係:你唔x係嘛?),鍾意程度係呢十幾年嚟嘅頭三名(另兩位係wall-e,elephant),很誇張,可能擊中死穴吧?!
  (循例一句,以下會有劇透)與"那些年"相比,"我"片沒有驚喜,明顯大路一點,低手一點,更近似偶像劇,優勝的是更順暢,完整性較高和打動到我,最多人詬病的結局,完全唔覺有問題/錯,說如tbb虛假大團圓更加攞嚟講,咁販賣廉價悲傷也差無幾吧?有幾點值得一講:1.現實時空(主要開頭)拍得太求其,馬虎,可以執得仔細一點!!2.點解成人版唔搵番王大陸宋芸樺自己做番?(話說回來亞暴龍今次演出又幾好,唔似自己之餘[雖然係基本,但唔係人人做到]仲令我信服佢係長大了的徐太宇),就算唔做成人版,最後一幕補多一鏡兩人的少年版行去睇show都好吖(如時光倒流70年結局/人鬼情未了上身一段),很想睇兩個喺埋一齊(成齣戲之前未有過).3.宋芸樺中段曾變身齊蔭除眼鏡,但我覺得開頭夾起頭髮4眼時靚啲.4.首歌好好聽,因為憎地獄鬼國,所以一向對國語歌帶幾分討厭(國語/普通話我又未識分),但呢首......我又跪低,橫掂我已經大反常態唔爭在做多樣醜怪嘢-抄歌詞(唔係講外語)......"原來你是我最想留住的幸運"肥豬肥肥,生日快樂!

講吓戲(上)

  裝咗now咁耐先知原來有錄影勁能,加上因為三上我又再上網搵戲睇,所以近兩三星期睇咗勁多戲,講戲經前先打底,貫徹扮嘢懶勁懶型作風,我睇戲都唔太大路,近年興起嘅漫畫英雄片唔啱,動作片唔啱,奧斯卡行貨嘢唔啱,商業片多數唔啱(愛情片除外),恐怖血腥鬼片更加唔使講,喜歡的戲最緊要型要真誠,以前更會偏好睇較深(有深有淺唔好攞嚟拗)嘅戲,講咁多都係因為,有齣戲我好鍾意,俾著以前係發夢都諗唔到我竟然會好鍾意好鍾意好鍾意呢齣戲,最後先講,而家先講其他;"救火英雄","全力招殺",兩齣郭子健作品,聽電台或電視嘉賓郭導生鬼有趣勁吹得,但一講到拍戲,處男作"打擂台""野良犬"算是合格,"救"片衰充大頭,吹到好大好大但原來細哎嘢,部份場面仍算可觀,余文樂個仔一段係幽荷里治一默還是認真膠?檸檬演技絕對可以同古天樂鄭伊健鼎足而立;"全"片更不濟,冗長沉悶,當時上映做宣傳時以為是笑片,點知落差太大,煲到好大嘅林敏聰更加慘不忍睹,還是回獎門人之類合適,"打擂台"真,"全力扣殺"假;"魔警"一貫林超賢低水準;"掃毒"已經係陳木勝冇咁難睇嘅一齣;"三岔口"開大咗草草收場,拍電視劇啱啲;"盲探"是我一向較喜歡杜sir的輕作品,前半比後半精彩;"一個人的武林"那位強國演員的演出也是一貫的破壞性/災難性,睇條友睇得好辛苦,戲則短小精悍,可以;"爆3俏嬌娃"柴娃娃求求其其幾好玩,一些對白突兀但抵死,一看無妨;"喜愛夜蒲3"唔講了;"罪惡城2"似足第一集不知所謂,將煞有介事更加推至極限;"車手"銀河出品鄭保瑞執導應有一定水準,成齣戲好似係咁揸車揸揸吓就完咗,奇片;講唔完,待續......