原來原來爸爸......

  睇戲嘅主角嘅老豆通常都有啲格言呀家訓呀座右銘之類留低,我爸爸係冇嘅,鬧人嘅口頭禪同啲舊衫褲就大把,錢唔知點講,由我保管張提款卡嗰幾個月一蚊都冇攞過,由第2個人保管就光束花光......
  細細個,好興人咃一問候娘親就反枱甚至開拖,我反而俾人鬧我老豆先會扯火,但當時我係親阿媽多好多,記憶中老豆成日周圍飛,到全家人各散東西得我同佢兩個住,佢都會一聲唔該去美國幾個月(經常添)......我同佢嘅關係照計應該幾好,因為成世人陪佢最長時間嘅人係我,陪我最長時間嘅人係佢(得我冇出國留學),平時又嘻嘻哈哈好fd咁款,雖然不嬲知佢偏心兩位哥哥但都係好正常,直到到我出事,佢竟然......我係憎到入骨,後來忽然變老,再老人痴呆,我先冇嘢......
  佢冇嘢留低,接近成世冇同我認真傾過或傾過認真嘢,呢排我先發現,原來佢影響我都幾深,最似佢應該係我:終日狀似嬉皮笑臉永遠唔認真,講嘢冇內容剩係串串貢或講笑,自大,懶過x,愛發白日夢,睇錢大過天但又理財不善,易受騙......我又冇好似其他人咁後悔以前冇對佢好啲之類,但,在心中.
 

從前從前爸爸......

  十月二日深夜三點左右阿衰仔妻有覺唔瞓喺度搞搞震,嘈醒咗我之後我瞓唔返,磨到五點幾先瞓到,六點幾就起身出房,屎忽鬼見我劈頭就話:老豆......死咗......我唔識反應,直到呢刻都唔識/知,好彩呢幾日病掛住咳同勁食藥好似充實一點.

  十月六日飛去鬼地方奔喪,家姐照舊唔出現,好吖叻吖,如果呢篇blog喺九號寫,一定充斥戾氣.勞氣十足粗口橫飛咁xx兩個人,但過咗幾日都係算啦,畢竟老矣......呢次去鬼地方唔係旅行,反而眼界大開,先是夜闖領事館,眼見的處事手法實在諗都未諗過唔到我唔服;後是喪禮,馬虎草率求x其其是x但但污糟辣撻係意料之外情理之中,最別出心裁係阿媽,亦因為係阿媽,所以就此收口.

  呢次事件,有兩大發現(?),1.真心膠是很可怕.唔係100%真心膠更好怕;2.口賤的人原來真的賤x格.賤到入心入肉,係自私x.

  上年生日之之佐佐最後冇切到蛋糕甚至冇蛋糕食,原來以後係再冇機會睇/同爸爸切蛋糕..............................................................................................................................................................................................................................................

最冷一天

  樓下商場喺暑假有活動搞,主題係芒痴痴......若果喺六年前,我一定會開心到飛起,一定拉住你去足咁多有份搞嘅商場,儲齊有關紀念品,一定會好開心,一定會......
  如果可以寄封信俾六年前嘅自己,一定會叫我唔好咁仆街......總結我嘅過去,認為最貼切嘅形容詞唔會唔係人面獸心.
  忽然想起中一時,每班會有兩個學長用半個學期時間幫助初上中學的學生適應,上學期完結,學長臨別時給我一張書籤,寫著"把你的聰明用於正途,你的乜乜乜乜(唔記得)會更大",唔知係咪人人不同,但,算唔算一語成讖?
  六年了,希望你過得好好,更好!
 可能個暑期活動,搞到夢見你的頻密程度達前所未有,其中1個夢,我係好驚,驚嘅係,我依然係仆街,人面獸心,超級無敵偽善......點都好,六年前今日828我會記住,點解當時唔知事態嚴重,點解當年(又嚟.....).....

減你

  尋晚夢見你,兩次,第1次夢見去你屋企,見返你兩兩個細佬,喺你屋企我先有家的感覺,個心唔會亂,臨走話想去你度食飯,仲兜口兜面問你老豆喺唔喺度(現實分水嶺係喺樓下撞到你老豆),你答有幾日老豆都放大假......之後達達仔嘈醒我,再瞓返我去咗浸溫泉,打俾你約食飯,你答星期六,有兩個時間,一係好早一係好夜......
  夢見你唔知係咪因為你送俾我個鬚刨近日壞咗,我成日諗住我又要減一樣你......

續集

 

  近來經常在now看電影(實在討厭喺個芒度睇戲),看的多數是以前不屑一顧的類型,大多過目即忘,入腦的少之又少,喜歡的更鳳毛麟角,講講喜歡的幾齣,恰巧都有關春春,如"初戀有病",和上面首歌齣"少年自讀日記"(片名夠不知所謂了吧?),男主角是神火波西傑完森(好似咁叫)嗰位,實在是美少年,貌像極以前偶像基斯頓史利達,只是更標緻,靚仔,女主角是妙麗......都係唔講咁多,搵嚟睇啦,我喜歡呢齣戲喜歡到........竟然三日之內睇哂8集"哈利波特"電影,需知道,以前與妙麗從未過電,亦唔覺佢靚(佢唔似robbie williams咩),睇完日記發覺有少少愛上佢,睇完"哈利波特",話咁快又愛完,睇嗰陣投入唔到魔法世界(好似一睇鬼片有特技就忽然唔驚抽離咗咁),只覺都幾緊張,最尾一集還有一絲感動,佛地魔講嘢都幾幽默,就係咁.
  續集多數比不上第1集(有例外,咪又係"教父","蝙蝠俠","星戰"),最討厭係,搵唔齊腳就整死(或其他)第一集主要角色,推翻哂首集嘅脈絡(電視/電影都係)......多數睇完開頭,唔好睇但有續集甚至更多我都會睇哂佢,慣咗係咁,除了"吸血新世紀","飢餓遊戲",嚟緊志明春嬌......等,因為,上述幾個系列,開始時都係有你和我在一起,當最重要的消失了,還看下去作甚呢......
 
p.s.睇返上文,又覺得似癲佬所寫,跳躍欠耐性想講冇講......

我記起

  恭喜發財!!

  以前愛到黃大仙掃街(尤其過年時),在云云檔口中,你永遠備受冷落,冷清指數非一即二,但,你是我的心頭好,見到爆炸頭伯伯出現一定買五蚊廿蚊不等,每次幫襯唯恐是最後一次,直至近年乜春都童件回憶+本土,動新聞也來贈興,年初一我專程去捧場,你兵分兩路檔口,兩檔也是大~排~長~龍,人龍有十人以上......都戥你高興,最特別嘅係~你無名字,又唔係話冇,只係冇個統一稱呼/名字,以前我同事話叫臭魚蛋,我沿用至今,你檔口初初冇,後尾就寫叫炸魚球,出位後多數人叫你炸魚蛋(咁咪同慈雲山老蛋有少許混淆),諗起你怪怪嘅口感+甜醬,縱要轉幾程車,又想探你......

  初一打去同阿媽拜年,例牌開口埋口錢錢錢之外,也有來好消息,希望唔再係貪口爽吹水s啦.
 
  今年年三十喺正特別日子,心情忐忑.

  行花市我諗起摩士公園,貪行完可以去埋黃大仙掃街.

  元旦,無意中電視睇叱吒,整個流程十年如一日,對,十多年前我年年都去現場,換飛係年度大事,因為張信用卡啲分唔換飛唔知有乜用....講返,我聽咗咁多歌冇隻好聽,不過,不嬲聽歌好少第1次聽就覺好聽(除了有埋畫面),睇吓有冇機會再聽多次啲歌啦.

  平安夜,我生日,諗起黃耀明"母親II"其中一句歌詞,也諗起最憎嘅士多啤梨蛋糕,平價火鍋.

  十二月九日我老豆生日,翌日我先飛去鬼地方探佢,今次有阿嬸同行,係咁多次到訪鬼地方最合意嘅一次...

  早前見有小說比賽,我屎忽痕俾個理由自己構思吓個故仔,當然係自己嘅故事,諗諗吓又有新角度,非常詫異以前我會係一個咁嘅人,陌生到我好憎好憎好憎......臭魚蛋你唔鍾意食,我硬係要你食幾粒,睇叱吒,何CC第1次攞獎,你失控不停說未得未得未得,我想講而家香港得佢一個得,老豆現在老人痴呆,未呆哂之前,我啲女朋友佢只記得你肥妹,摩士公園同你買風車,個風車而家仲掛喺窗邊,我成日講(其實講笑)我生日你買我最憎嘅士多啤梨蛋糕,帶我同你父母去你樓下食平價火鍋,而家我最恨食係呢兩樣,鬼地方我咁憎,其實,原罪係我第1次去完鬼地方後,你唔再見我,真真正正分了手.