睇戲嘅主角嘅老豆通常都有啲格言呀家訓呀座右銘之類留低,我爸爸係冇嘅,鬧人嘅口頭禪同啲舊衫褲就大把,錢唔知點講,由我保管張提款卡嗰幾個月一蚊都冇攞過,由第2個人保管就光束花光......
細細個,好興人咃一問候娘親就反枱甚至開拖,我反而俾人鬧我老豆先會扯火,但當時我係親阿媽多好多,記憶中老豆成日周圍飛,到全家人各散東西得我同佢兩個住,佢都會一聲唔該去美國幾個月(經常添)......我同佢嘅關係照計應該幾好,因為成世人陪佢最長時間嘅人係我,陪我最長時間嘅人係佢(得我冇出國留學),平時又嘻嘻哈哈好fd咁款,雖然不嬲知佢偏心兩位哥哥但都係好正常,直到到我出事,佢竟然......我係憎到入骨,後來忽然變老,再老人痴呆,我先冇嘢......
佢冇嘢留低,接近成世冇同我認真傾過或傾過認真嘢,呢排我先發現,原來佢影響我都幾深,最似佢應該係我:終日狀似嬉皮笑臉永遠唔認真,講嘢冇內容剩係串串貢或講笑,自大,懶過x,愛發白日夢,睇錢大過天但又理財不善,易受騙......我又冇好似其他人咁後悔以前冇對佢好啲之類,但,在心中.
