月記

all work and no play makes vee a dull boy
all work and no play makes vee a dull boy
all work and no play makes vee a dull boy
all work and no play makes vee a dull boy
all work and no play makes vee a dull boy
all work and no play makes vee a dull boy
all work and no play makes vee a dull boy
all work and no play makes vee a dull boy
all work and no play makes vee a dull boy
all work and no play makes vee a dull boy
睇過閃靈嘅當然記得上面句嘢,嗰段戲亦係積尼高遜巔峰嘅演出,睇到o咀倒抽一口涼氣,心都驚到鳩縮......喺現實入面,近40零日睇到嘅,聽到嘅比戲更得人驚,我相信斯德哥爾摩症侯群論......我經歷過89,97,千年蟲,2014......都算係咁囉

早一個星期寫呢篇可能會講搬新屋後好運咗,買波買馬好好運(唔係嬴大錢,係應該輸時--66變唔駛輸或嬴),但剛剛過呢一個禮拜,推翻哂,慘.......

睇老表,最好睇依然唔係主角係側邊啲人,王苑之有自己一套了(如劉嘢達初初夢遺大夫同後期嘅分別),可惜少少,肥妹v乜鬼好笑咗,冇以前嘅自覺,張繼聰令我諗起鄭中基初現電視作搞笑時(我鍾意鄭中基架),最鍾意睇佢;其他路芺都還可以,唯獨王祖藍的演出是災難性,破壞性,廿幾年前阿燦都嫌棄嘅方法佢仲用之餘還自以為是笑匠,嗰種乞人憎法令人咋舌,之前積落嘅好感一舖清,唔好做戲去番扮鬼扮馬把啦......劇情我寧願佢得啖笑為搞笑而搞笑好過而家不柒知所謂,調子不一係死罪,其他都費事講,人人讚嘅地方我都想彈,不過費事啦,人人讚嘛......

英超好難唔係車仔攞囉,天呀,繼德國捧世界盃後又嚟打擊我.....

好歌分享

  有些事情,你/想扮中立,就會變成中立撚,只有對錯不容觀點與角度輕重,唔識就去了解吓先,唔出聲冇話你啞.

https://www.youtube.com/watch?v=ep-TAxRznPY&feature=youtu.be

點解插入唔到影片?

一波兩折

  琪琪,大阿哥,阿媽喺上個月先後到港,詳情遲吓講,但阿媽喎,上年12月嘈過後冇再聯絡,佢做咗好多小動作我都唔鬼理佢,今次闊別九個月重逢,我就梗係即刻奔緊搵嘢做避得就避,可惜係搵4份工冇份有回音,佢又忽然提早出現,我唯有死死氣去見佢,見到面大家扮冇嘢,好似冇事發生過咁,見佢同家姐又和好如初,我只覺得好笑,阿媽你咪同衰公一柒樣,當初你就咪撚笑衰公啦.去到呢度,唔型嘅事終要發生,呢幾日見過阿媽幾次,差唔多次次見都聽到佢認叻(預咗)同讚家姐間公司上年純利係幾多幾多(據慣例家姐講嘢吹大十倍,除番十純利都幾唔錯),聽到耳都乜埋,話發大間公司,即係我ceo檔嘢有搞作,買咗八千零蚊電腦,家姐搞埋細節就開工搵錢,寫到呢度我都覺悶到仆街,總之照往常冇問過我意願就幫我諗好我要做啲乜,衰格/唔型在我又冇反抗,鬼叫搵唔到工咩?
  第2折,喺我樣衰衰(堅)下等開工,之前搵嘅工居然有回覆,凡面試,表現差到無倫,肯定唔會請下居然請我(做倉),我即刻返工,即刻型番哂,講完.眼瞓下寫呢篇係有啲催眠,有啲細節幾過癮,有心情再寫,何解冇心情,因今日喺新蒲崗返工,冇錯,係新蒲崗,我成日教你讀新蒲光同新蒲崗,想起你讀時戰戰兢兢的模樣,今日返工時眼涙又失控了......新蒲光係我記得你的其中一樣..........

82728

  三年了......
  三年以來,每一天也是苦,難過.

 

  唔知係咪臥病在床三個禮拜,諗多好多嘢,如生死,其實我三年前已經死咗,做咁耐人先發現最重要係唔可以冇咗你,但偏偏就會發生......
  以前同一間舖,每晚一齊收工,最後我都會播"約定你"......


https://www.youtube.com/watch?v=Ik3ElKQ0SCs

心痛蓋過憤怒

有時一個影像勝過千言萬語,上周最震撼我心的,係撞死狗事件(不喜歡叫狗做毛孩)(另有一條片唔敢睇),當然要追究到天腳底,不能姑息,還有,未雪屍首現在哪?要風光大葬,靈位放在九龍灣才行......看到狗狗茫茫然,溫溫馴馴的,努力求生,再看月台人員的官僚,我很憤怒,哀傷,真的很心痛,背後還可有很多話說,但最最重要的,是狗狗柱死了.我很心痛.

搬屋 第一回

  搬咗新屋兩個禮拜,初初驚達達唔慣,點知自己最唔慣,我係嗰啲日日食同一樣嘢都唔怕,唔好有改變最好嘅人,搬屋真係好大件事,以為六七箱點知十五六箱都唔夠,仲要掉幾千本港漫,舊屋嘅回憶太多,見證住由好人變人渣,怕狗變養狗,最錫老豆變最憎,最重要當然還是她,要形容,最貼切不會不是由在天堂跌落煉獄,失去她就係......冇哂,空哂,可以去死.講番新屋,搬嚟咁耐病足咁耐,頭7係咳+例牌,後7係腸胃+例牌,前者係俾人傳染,後者係自己攞嚟,因為我飲咗奶茶,明知人生奶茶配額已用盡,仲死去飲真係抵,因為嚟咁耐病咁耐,未執好嘢之餘對新屋印象麻麻......

仍心跳

17/7我讀嗰個電影班畢業,搞咗個盤菜宴,話係鄧達志個親戚搞,但食落咪又係盤菜(我不嬲係幾唔鍾意食),而且我可能係別人口中嘅屎忽鬼,我見食盤菜居然唔用公筷係當堂打個突,男人老狗不拘小節有乜所謂,如果係咁我做娘娘腔好過......當時我解決方法係,盡快搶攻,狂/快食面嗰朕,再狂攻要汁嗰啲(如枝竹),好快我就停手,就去食炒飯.

以前返工人人話我冇論咩話題我都可以扯去變成講3級咸濕淫賤嘢,而家我自閉唔知呢樣秘技有冇生疏,但肯肯定練成另一項,就係每一樣事情/東西都有和你的一份回憶,盤菜當然有,但從略.搬新屋,我去抹嘢時靜鷹鷹,唯有罕有地播住手機嘅歌,一響起某首歌的煙草(那是用作你來電的歌曲)心頭狂跳不已,以為你會搵/覆,最後當然只是空歡喜.但我記住當時一聽到即刻衝去電話度嘅喜悅.

又講遠咗,講番讀電影,成日睇其他電影人都話讀呢類班時纏住導師跟手入埋行,我都諗住咁樣,但最後上咁多堂我好似一粒聲冇講過.

有我架,最懶型嗰個就係.肥得唔肥算係咁

繼續搜尋

講嘢

以前睇世界盃,最過癮係咩波都睇,日以繼夜咁睇,尤其分組賽要場場睇,好讓自己全心全意投入世界盃,而家?老啦,唔場場睇,戲碼弱少少都唔睇,有時想睇兩場又攰到撐唔住,不過,呢排睡眠好咗,係幾年以嚟最好,有晚發夢送你返工,唔想醒呀!!賭波重紀律,我又衰咗,口裡說唔好買過關,但頭九日買咗四次三串一全部斷一關,我有個獨特痴線計法選買波,但計完要同我愛隊打對台,我會走去捧愛隊(英格蘭克羅地亞和西班牙),呢度又輸咗好多槍,仲有孖寶半全膽又hi,話雖如此,計落仲係嬴嘅,去到16強愛隊出哂局(阿根廷係撐佢冠軍,唔算愛隊),每日兩場起一場止冇得過關,可以專心賭了.
廁所咖啡事件,嗰對飲食男女啲對白實在交足戲,男嘅擺明呃蝦條,女嘅口裡說不身體卻很誠實,教材教材.
鍾意睇廣告,早輪對熊貓食粥嗰個廣告鍾愛不已,潮男星人睇到血壓狂標,徐乜珊喺沙灘個廣告慳皮又戇膠,最想講係麥包嗰個,膠布下有細菌彈吓彈吓,真係好恐怕,睇到起哂雞皮涼得一陣陣,好很驚.

世界盃~~世界盃~~

要講世界盃我條口水佬閒閒哋可以講幾萬字,但當然懶得就懶唔講咁多,講近兩屆重點,2006年我下了一個成世人都會後悔嘅決定,影響到我而家係了無生趣喺度等死,如果可以番轉頭希望可以番去06年;2010年我和你入馬場睇咗荷蘭對日本(好似?),係世紀之悶,但只要有你在就......無意中睇番我曾經寫過去日本旅行嘅行程,諗住和你一齊去,點知我爛賭去唔成(唔知你知唔知我嘅計劃),因為爛賭我同你只去過一次泰國旅行,萬千憾事之一也.....捱到經濟好轉,可以去旅行嘞,諗住起碼一年一次,未來幾年去邊都諗埋,卻是2011年......
講今年,英棺蘭克羅地亞盲撐唔駛講,買冠軍會買阿根廷,巴西咁嘅人腳得啖笑,大菲亦無料到;德國更差,心理質素亦已非以前西德般強;西班牙早幾年已講有大把接到班嘅年輕球員,但到而家都係用班老傢伙;葡萄牙單天保至尊,我係信可以嘅;4強有機......

禍不單行

1.你也是海派甜心信徒,自然喜歡愛不單行,我唔鍾意睇都識唱俾你聽(用老牛聲唱出真係好正),縱然覺得首詞麻麻哋......呢排夢見你次數明顯增加,相信與月底搬屋有關,我間房嘅牆,燈,床,衣櫃裝飾全部同你有關,怎可忘記呢???雖然分開將近三年,但每次稍為用力想想,眼淚自自然然又會不請自來......當日車禍我死鬼咗你話幾好呢???又講遠咗,上星期,落雨我行樓梯跣低坐咗喺度,撞親4個部位痛到飛起,個頭冇撞到但又會痛,當日車禍令我面部神經有問題嘅位置又隱隱作痛......很多事情加加埋埋就會毛躁,就會睇馬田史高西斯嘅的士司機來止咳......
2.母親節冇搵到老母,問我仲有冇嬲答案係冇,因為不嬲都冇嬲過,冇感覺,見到人人孝順也沒異樣.
3.早前讀編劇學咗啲嘢,要寫出嚟,寫寫吓自己都冇哂癮,因為寫緊嘅兩個故仔係對狂國人嘅憤怒,忽然想起真的戀愛了所講,911最後一刻打出去的電話全部都是關於愛,沒有恨,所以我將和你的事化作故事,很簡單的,故事重點係,唔會想/令/要自己好過一點而對一些事情/信念扭曲作配合,就像呢個blog最頂段日文所講:是真的,一百萬年也不會變.
我一病或有事就會發花癩......

綠油油,戇狗狗

以前好鍾意好鍾意同你一齊帶波子遊西貢(雖然只係兩次咁大把),而家冇呢個機會......有日睇忽周講狗公園,原來彭福公園(馬場)係放狗聖地,咁就老人與狗去公園啦.

 

原來平時喺屋企附近行街惡屎能登見狗吠狗嘅傻仔達係細膽都冇朋友,簡直係膽小如鼠,平時唔多肯跑嘅達達,最肯跑嘅時候,就係喺隧道俾迎面而嚟嘅狗仔吠,嚇到掉頭跑,愈叫愈走添......

講吓戲

  早幾日係金像獎,頒前專登去睇吓較多人談論嗰四齣:一代宗師,激戰,殭屍,狂舞派,睇完四齣都唔多鍾意,排名也是有的,順序為一狂激殭,從尾講起,殭屍係朱奴首次執導,佢上兩齣自資做主角嘅戲搵嚟黃精甫執導,擺明以影像先行,要型要型要型為主,呢齣話係黃執導我都會信,因真係好似,賣點係......都係長話短說,講講吓都好似齣戲咁悶,氣氛營造係得嘅,但特技用得唔好,搵嚟大量年老演員(唔鍾意老戲骨呢個詞,也討厭坊間一面倒說年老演員=好戲的說法)一齊非常造作的演出好難睇,消費往日情懷也乞我憎......激戰有別導演上幾部作品的沉重,但偏偏呢部先係最值得沉重的電影,水溝油現象再次出現,刻意放鬆換嚟乜都唔夠力水,幾段戲冇段到,最可觀的就是三男的一身肌肉,張家輝我得承認很有觀眾緣,但至今未有令我折服演出......狂舞派四平八穩幾好睇,係就係神采欠奉,,但真係夠四正,男女主角又好睇,女主角係我鍾意嗰款添,加哂分啦,提一提係齣戲嘅所謂金句,睇之前已聽到爛,喺戲入面出嗰陣還有後著再加強,呢吓幾勁......一代宗師唯美講究,明明幕幕都極盡刻意之能事但又透著一份從容一份寸,呢次唔係要睇你唔明係要你睇唔哂啃唔哂,報仇條線大可慳番,但存在又好似俾章子怡表演,幾唔鍾意佢都好1.1倍都要買佢,其實葉問都應該係攞梗影帝,嗰份氣度邊個做得出?講到亂78糟因為懶,費事修改,反正你都唔會睇.

睜不開雙眼

忽然發覺好耐冇乜點聽廣東歌走咗去聽英文歌多,唔係又講以前廣東歌好而家渣之類,亦唔係乜嘢其他大原因,只係廣東歌我聽得明英文歌聽唔明,明歌詞講乜又因為多數係情歌再加上個人有少少痴線,乜都可以自憐一番,愈聽愈感傷索性少聽到唔聽到抗拒......又醒起和你分開前幾個月,我係喺度諗緊我們的婚禮上我要唱咩歌?醒呀哩,未雨綢繆嘛......
上面隻歌係我的五大,當然又是和電影電視有關,冇錯,又係世紀末之詩!!
早輪病完之後個頭成日痛,頭暈就話慣哂頭痛就少,同埋痛到雙眼好攰,唔想張開咁......之前講過我肥咗之後雙眼都細埋,原來唔止,連眼珠都好似細埋,三白眼咁,難道真係要痴線......

琪琪來了

舊年12月嘅事咯,衰公生日,屎忽鬼又係訂鹿鳴春,呢次叫埋親戚立哥同阿嬸去,諗住多啲人可以嗌兜翅食喎

睇番以為係舊相,因為叫親啲嘢都差唔多

 

屎忽鬼即係屎忽鬼,去到見個翅貴縮沙改第樣喎

清炒蝦仁,賣飛佛

蔥油餅

京燒羊肉,正嘢

隻鴨一瘦就真係麻麻

跟住琪琪嚟香港探衰公(本來衰公過美國架嘛),有日就去食自助餐,呢間位於佐敦嘅酒店自助餐款式夠哂多,基本上乜都有咁滯,質素就算做可以合格嘅.

鵝肝,算係咁啦,衰公原來好鍾意食,食咗十幾廿件

磨菇湯幾好飲

龍蝦一人半隻

帶子都幾大隻

右邊係琪琪,好似家姐,好似男人好妖艷

有日早餐食熱香餅,疊埋食好味啲

頭先自助餐有生蠔,麻麻哋,同星際差好遠

琪琪臨走前食雞煲

衰公猛彈,我覺得好好食

年...又過年......

  咁就又過完年,最鍾意嘅節日咁就完,以前過年好鍾意睇見啲車亂泊,舖頭間間唔開,小販空群而出,人人都經過打扮先出去拜年,戲院做埋一啲平時一定唔會睇但過年又會去睇嘅低能賀歲片,總之處處透著的一點點不同是我最喜歡的,當然而家唔同哂啦......講番今年過得如常地充實有意義,幾點可以講完.
1.今年應該係收最少利是一年,嚴格嚟講有冇收過都成問題,因為同衰公拜完年都冇表示,開埋口叫佢俾先俾,仲要冇利是封嘅,仲仲要係俾咗五百叫我找番啲俾佢.
2.初一我又去多次黃大仙掃街,依然係冇你一齊嘅.
3.我睇咗無線齣新抱喜相逢,我知唔型,但睇賀年劇先似過年嘛.
4.一個和我同樣喜歡野島伸司嘅人介紹我睇來自星星的你,一睇就睇咗12集(兩日),好睇說不上,男主角好型女主角以前幾鍾意,呢齣嘢最勁係每集幾悶都好,去到結局都爆,好想追睇落去.
5.買馬中咗$10851嘅q,成世人中最冷嘅q,同埋中咗兩次孖寶半全膽.
6.睇有線睇咗幾次情迷索瑪莉,女主角從來都覺樣衰,唯一喺呢齣例外之餘仲好吸引,亦再睇咗真的想嫁你,以呢類戲嚟講係水準以下,但有佐治就唔同,睇吓上面段片......成齣戲嘅亮點就係佢,唔係做慣常搞笑位角色就特別搶戲咁簡單,係有自己一套,好有魅力+力量的演出,帶生成齣戲,奧斯卡欠他一個獎.
7.初一喺屋企煮飯(唔係我)食,好耐冇試過.

年三十......晚

  今日蛇年最後一日,夜晚去咗買爭鮮做團年飯,因為年三十晚關係佢收早,去到已經所餘無幾夾硬買夠三百一番去,一路胏生死時速一路食,食完無無聊聊攤咗陣,就出咗去黃大仙掃街,串燒加到十一蚊串,臭魚蛋要十蚊起錶,格仔餅買完都唔知幾錢......我就最鍾意嚟呢樹掃街,尤其係喺新年......我以前成日掃架.......

今晚你生日

  要接受我已是局外人實在殊不容易.
  一年最重要一天沒我的份兒......
  又是那句,平常掛在口邊的傷心呀心痛呀原來不是口號,是有形有實,心,真的會痛......

去年的十二月

  節日冷感的我一到12月總會有點異樣,畢竟自己生日總好像比所有節日來得重要(除了你生日),但自從你走了之後,我的生日又變回微不足道,比所有節日更不如/無聊.剛過去的12月發生了幾件值得一提的事,姑且用喜怒哀來分類吧(唔駛問點解冇樂啩).
  喜,是琪琪來港探衰公,本來講好是衰公過美國唔知點解最後變成琪琪來港(我家姐2月都回港),琪琪(家姐個女)都有十幾年冇見過,以前見佢都係粒人仔而家成廿歲真係好陌生,嗰陣得幾歲啱啱識行路啱啱識講嘢咁上下,成日叫我舅父仔舅父仔,曳到飛起,嗰陣讀完書住黃埔日日起身租帶睇戲鋤2出街食飯又一日,係退休生活嚟,每日大事係五點零六點,碼頭嗰樹有小販賣魚蛋燒賣雞蛋仔之類,我哋窗口對住個海,一見開檔就落去買嘢食.呢次琪琪返嚟乜都唔記得,剩係記得魚蛋,但我都冇帶過佢去食,返嚟十幾日剩係陪過佢一日去街,去旺中買衫,佢一買兩粒鐘,之後去尖咀影相(燈飾),搭船過中環再搭番嚟,沿海旁行去火車站就返去.喺尖咀影相時我已經冷病咗,仲斷斷續續病到而家未真正好番過......聽佢講番成長都幾悲慘(堅慘),但佢又好似冇乜樣大癲大肺鬼妹咁款......我好錫佢架,不過唔識表達心照就算,照唔到都冇辦法,舅父仔唔出聲架嘛.
  怒,係我同阿媽炒鑊勁,勁到我會為炒嗰陣冇觀眾而婉惜,我喎,我都會發火,鐵樹日日開花啦.佢鍾意認屎認屁讚自己冇乜所謂,唔好要我加入埋一份嘛,有啲嘢佢唔講我都側側膊算數,之前問過兩次氣氛好好下我都唔怕仗勢壓我照直講搞到佢一面屁,我係冇兩位哥哥咁大方,嗰啲咁智障低能謊言都照單全收......都係唔講,總之嚟香港要我陪吓冇所謂,幫我諗好嘅計劃可以慳番,啲錢留番自己駛唔駛預我.唔再聯絡都得架.
  哀係你細妹結婚冇請我飲,一路都覺得冇所謂,唔請就算,但原來又高估自己多一次.我最上心就係呢件事,我係好有所謂,以前你話過我哋係家人,我亦當你係唯一家人,點知最後會係咁.

七日六夜之旅

上年12月發生咗幾多事,諗住寫吓先醒起有呢篇嘢未出,暫時睇嚟有排/以後都唔會再去呢撻地方.

第一日,朝早去阿嬸度拎帶過去嘅嘢,買盒燒味飯返屋企食完就出發......

飛機餐,即代表要飛了

去到嗰邊,機場前所未有咁多人,海關效率依舊低,好彩係今次冇俾人屈錢,喺飛機準時起飛下都要遲成粒鐘先出到去,阿媽來了接機,新意來了,搭巴士返屋企喎,架巴士初初冇開燈黑蚊蚊幾恐怖,仲有見個司機收客錢冇找番俾人囉.

原來間酒樓裝修,即係呢七日都唔駛去,都好,唔駛見咁多人,第一餐咖哩牛腩,味道真係冇得頂,係啲腩未夠腍,我食咗碗飯同大半條法包囉.食完行去隔離碧屍買薯片汽水之類等夜晚睇波食,點知七點九冇播曼城,十點阿仙奴同十二點半曼聯場波時我瞓咗,曼聯場波完場我就起身到天光......

第二日,阿媽嫌pho華遠又去隔離間pho24試吓,估唔到好多分店嘅連鎖pho專門店會咁好味,同香港嗰間完全兩回事,當然比不上pho華,但唔差太遠近近哋嚟呢度食都好.

 

連汽水甜品六萬九,廿幾三十蚊港幣啩

食完我又去碧屍,呢次慢慢行買手信,個場都幾旺,星期日嘛,行完返去hea,到夜晚再出發到喜來登食自助餐,夜晚多嘢食過上次中午好多好多,算係咁架啦,有半價喎.

第三,四日,足不出戶,第三日朝早食法包飲椰青,午餐食燒排骨,排骨整得最好係呢次,之後,我就肚痾,痾到第六次時.心諗會唔會痾到9次呢,點知最後到凌晨總共係17

第四日,買咗4個包同豆漿俾我全日食,又用古法焗汗嚟醫我,要幾騎呢有幾騎呢,呢日冇痾,但發燒+頭暈囉

第五日,好番少少,一早夾硬俾阿媽叫咗去再食牛肉粉,當我真係好番咁......夜晚喺屋企食飯

第六日,阿媽生日,又係晨咁早去碧屍,先食早餐,L字頭類似麥記快餐店,價錢平到爆又幾好味,再買陣嘢就返去,本嚟諗住煮餸當做生日禮物,點知大病一場打亂哂,呢日中午煮咗兩味餸當慶祝咗

夜晚請咗廿幾人嚟食飯,訂咗隻乳豬好平好抵食

走嗰日,朝早食多次牛肉粉