暴戾

  前年聖誕,和你分開的第一個聖誕,你請我去澳門玩作生日禮物,我很開心,還認為復合係遲早嘅事;上年聖誕我剛由鬼地方返來,返來之後你就唔肯點見我(至今只見過4次),上年聖誕發生過咩完全唔記得,今年,又係咁,忽然明白變態佬/癲佬是怎樣煉成的,先決條件係得閒,大把時間剩......今年聖誕非常唔開心,長期處於發掹,不安,心急狀態,賭錢也不能平靜下來......

小孤星

  星期五去咗拜山,講起嚟都起碼有廿年冇去過拜阿爺阿嫲同阿叔,阿爺我未見過,阿嫲就好錫我,見親都會攬住我嚟鍚,佢整嘅豬肉又好好味,不過嗰時細個唔明嘅係後期佢係去老人院住,三家人(阿伯衰公阿叔)有地方有錢有時間,點解唔一齊住?而家大個就明明哋......呢次拜山屎忽鬼都有去,原來佢有特別任務,就係影骨灰存放位置同報告四周環境俾我家姐知,因為唔知邊個話風水唔好喎.三家人後代連埋我五個男丁都冇仔女,哈哈,咁都有得瀨?之後報告完畢家姐話風水真係好差,屎忽鬼話佢睇風水好勁......咁我又記起,家姐話過我係類似天煞孤星,一個人終老定好老先會有伴,唔知準唔準呢?哈哈哈......

forever blue

  你細妹下周擺酒,如無意外我都唔會收到炸彈......話哂勉勉強強我都算係佢哋嘅紅娘先生,雖則明白身份尷尬,如果俾我會做得好睇啲......忽然想起嗰個殺人狂心理測驗,咩喪禮見面嗰個,我唔係想飲,係想見吓你啫,嗰日幫你睇住波子都係好架......

昔時因

  上週中得知夢芝芝會在前日(週日)開始在東港城擺檔到聖誕,第一日有夢芝芝之父搞簽名會添,第一時間whatsapp約你,仲日日提醒你,你冇覆到話去或唔去,到週日,由準備出門口~>等車~>出隧道~>四美街~>落車~>到了都whatsapp你,你都係一隻字都冇覆,等了三個字打俾你你飛線,再等多陣就返屋企了.
  我成日諗好多無聊低能野,其中一樣係諗測字會提咩字去測,以前諗用個"醉"字,因為覺得好型,而家會用個悔字,因為而家我真係好xxx後悔.

復活

  王子復活s,呢次似真正復活,速度信心都返番嚟,但點解冇人講佢瘦番嘅?條腰冇咁粗,可能唔關事但忠粉會留意到.王子復活,惜赫特像更墜落,上季尾痾蛋因較早時宥傷,今季輸近柱係有少少肉酸(施治呢場夠輸近柱),呢次盲樁樁衝出嚟係冇得兜......施路頓之後嘅最好可能又係夢一場,我覺得......可能關派路事,因為赫特水準下滑之始就係嗰球十二碼.
  而家得閒,反而冇耐性睇書,去借咗史提芬京嘅閃靈,凶靈,同短篇小說集,係就係好厚一本,但都應該睇得哂,結果凶靈睇咗五份一(之前未試過睇唔哂書),閃靈只咗序(原來同電影好唔同),短篇就睇到"霧地異煞",明明睇嗰陣趣味盎然,偏偏冇心肝睇哂......

  lou reed R.I.P.

喜歡你

  何cc開演唱會,我當然又諗起你(以前啲同事話我講咩話題都可以拉到去咸濕嘢度,而家我個腦諗咩都可以聯想到你).當年同你去睇叱吒,何第一次拎女銅,你反應異常激動,口中唸唸有詞,呢單嘢我笑咗......唔係用年嚟衡量,係每一次睇電視報紙所有媒體見到何都會攞番出嚟笑.....有樣嘢你可能唔知,就係我等何開演唱會就想同你去睇......當然之後我又冇件事啦.......唔知之後仲有冇機會呢?
  所有何cc歌曲,最喜歡的就是這首,黃y文作品,少少奇怪是我覺得首詞填得幾好,但又不認同它所說的,講暗戀的詞通常會特別喜歡,這首說的暗戀只是糖衣,真正其實不是喜歡喜歡你,也不是喜歡"喜歡你",而是喜歡自己.

阿媽來了 第四,五日

  第四日,滂沱大雨,晨咁早打的去深灣唔知咩會所,大下到好似倒水咁,完全睇唔到路,都9知司機點解咁醒揸到.去到咩會所等咗陣先知去錯,原來係隔離香港仔遊艇會先真,好彩雨勢細咗好多,冒雨跑過隔離啦......呢幾日陪阿媽周圍見客,位位都......客氣得過份,又指定食住大魚大肉嚟傾,呢次呢個係鬼佬嚟,處事係唔同啲,喺入面飲杯嘢就傾,爽快.傾完先問去唔去食嘢,我哋有人趕時間,所以冇食就走......剩番4個人去到佐敦,唔知點解會去咗漢陽苑,講真,呢間漢陽苑係幫襯過咁多間中最好,可以話改觀添,有機會可能會再去嘅.唔似以前一定唔會番轉頭.
  夜晚要返學,冇得去食海鮮,阿媽心血來潮打包蟹腳俾我.

珍寶對面,都好耐冇去過珍寶囉

第五日,最後一日,去送機,順手去翠華,見有黑牛我硬係一定會叫,內心亦忘不了佛笑樓的黑牛,唔係特別好,係童年回憶而已.

呢度唔好飲

海南雞飯,我就叫咗公司三文治阿媽話下次嚟可能會去埋澳門玩,又係肥佬請食住,係就好咯,我一定唔會同佢慳.

返到去先食蟹腳,蜘蛛蟹,講真,係成世仔食過最好味嘅蟹腳嚟.

寧靜

剛去完旅行回來,不錯,又是那地方,如果要說是次旅程最特別事,答案是沒有,最開心的呢?我會說是回港之後送手信給你,三次去那地方,回來都可以借故約你見面,本要多謝那地方,但,和你由每星期見一次到不定期見面(以月計),分水嶺也是那地方(第一次去後回來你就很少很少會出來)......今次也是軟硬兼施才成,不要緊,只要還可見著你,我外表怎平靜冷酷肉漠,內心其實永遠充斥不安暴烈浮燥自毀,只有在你面前,才得一片寧靜.

在houston午餐,主菜依然有水準.

 

加廿蚊龍蝦湯,不行

 

牛油麵包怪都覺呢個包麻麻

水牛雞翼辣過籠

牛扒,正,平時多數走汁都覺呢啲汁唔錯

意大利飯,俾多三碟都唔夠食,太好味了,可唔可以嗌多飯?

只做不換悶x死人

  電影"閃靈"入面,有幕深刻印象,女主角(佢本身都夠哂恐怖)發 覺阿積有啲唔妥,想搵佢傾吓,去到阿積工作室唔見人,見到阿積寫嘅厚厚一疊小說入面只有一句"只做不玩悶死人"重覆寫滿哂,,,之後,阿積緩緩現身,影帝積尼高遜跟住一段戲係施展渾身解數精彩絕倫,我諗唔到仲有邊個可以做到......又講遠咗,剩係想講而家我正正係不做不玩悶死人,冇錯,我又飛咗去某國家七日六夜,星期五先返香港.

冷氣驚

  尋晚十二點幾就瞓著咗,因為依然用緊兩日併埋瞓一日嘅秘技(頭一日又未至於完全唔瞓,但瞓四五個鐘醒三四次咁囉),所以會好瞓少少,瞓到五點幾(歐聯都冇睇)卜一聲冷氣熄咗,仲一陣臭味,噢~~冷氣機燒了(唔知燒乜春,下意識係咁諗)......早一日其實已經有朕味,類似蝦米味,我仲以為係死老鼠添,原來係冷氣發出嚟......冇冷氣對我嚟講好大單,一來勁怕熱,二來怕靜,冇咗唔知點算?如果壞咗叫人整或換係好困難(相信要拆咗張床先得),兩三個月後又要搬屋,究竟應該點?好好彩,我睇吓插蘇係燒咗,可能只係咁,之後我踩車出去買插蘇頭,插蘇,買嗰陣問人,再上網睇人教點整,到我試整都係雞手鴨腳,最後出去搵師父幫手,輾轉下(好多波折)師父嚟到唔駛三分鐘搞掂,盛惠三百!!我冇咁多現金收我二百八......寫到呢度都冇哂癮......

阿媽來了 第三日

由於屎忽鬼要去新加坡,所以呢日一早出嚟去飲過早茶,唔敢再去就腳嗰間,行遠啲搵第間酒樓,原來冇咩選擇係得一間,好彩,呢一間好好多,叫做食得吓.

之後我返屋企抖陣,夜晚又再出發,呢次去我未去過嘅鯉魚門,請客個人揸車嚟接我哋,由佢個仔揸,阿仔廿零歲好靚仔吓,有我當年嘅影子,唔同嘅係佢周身名牌揸靚車

 

就係佢,仲有唔同係佢矮過我

食飯必備嘅酒

白灼中蝦,好好味

象拔刺身,好嘢嚟,內臟去煲粥

幫襯呢間

好難唔好食嘅餸

椒聯瀨尿蝦,肉質好,味較失色,爆冷

鮑魚仔好難失手,呢度大隻過尋日

班件,夠清

我咁憎食粥都食咗碗象拔粥

辣酒花螺,及格

呢味睇唔出咁正,魚骨咁上下,惹味之極,正常最啱送酒,就咁食都係一流

奄仔蟹(?)我嫌煩冇食到

睇落好正,後尾想食番但都冇食到

糖水

好耐冇食過餐係咁滿意,比上次去西貢餐海鮮呢度好太多嘞

阿媽來了.第一日,第二日

中秋,約你你唔答,明白!想寫吓近況,諗此吓係冇嘢值得寫,唯有講番上個月阿媽嚟香港幾日我陪住周圍去食飯啦.

第一日,兩點幾去接機,等成粒鐘先接到,原來同幾個朋友一齊嚟,有個白頭肥佬之前見過,老頑童嚟,一馬當先學人帶路,一開始,居然係帶去搭巴士而唔係的士......

喺巴士上,非常尷尬,因為佢哋一行人嘅行為同狂國人冇分別,坐到散哂又要傾偈嘈喧巴閉(我阻止唔到),最好笑係講完一大輪之後同車有一真正狂國人講電話,當然好似用擴音機咁,阿媽即刻同我打眼色笑人,有位入當然唔放過寸番阿媽啦.

明明有人請,但硬係住埋啲渣酒店,放好行李肥佬又有路去食牛什河之類,間嘢係非常難食,食食吓見蘇民峰又嚟食,希望佢都係貪方便,因為我睇過佢教煮餸當佢好識食架嘛.之後肥佬同其他友人一齊去尖咀,阿媽就同我同屎忽鬼去酒樓食飯,間酒樓以前午市幫襯過,屬絕不回頭水平,呢2又貪就腳試吓晚市,果然係自己攞嚟賤,難食標準再向下調,叫咗四五味餸全部差差差,片皮鴨真係嚇死人,其他都唔記得嗌咗啲乜,五舊水當跌咗......

第二日一早出發,八點幾已有朋友帶我同阿媽去食早餐,呢位朋友仲話細個抱過我添......搭巴士去到銅鑼灣,話去ccc食,我都唔知係乜但又要扮識:哦,好吖.....咁講又過到骨,去到先知原來係乜春會,個早餐平到不得了,平過茶記,水準差唔多,食完,居然要我返佐敦接肥佬嚟呢度食午餐......冇得話唔好,去到恆豐上扶手電梯,見大堂另一邊落嘅扶水電梯有幾條友向我個方向狂揮手,嗰幾條友一身獨特恤衫西褲打扮十足狂國人,我上面條友向番佢哋揮手,哦,原來同佢......再望,咦,唔係喎,有條友我認得,妖,原來真係向我揮手,咁我上面條友做乜應機呢?係約定地方等極唔見肥佬,周圍撞吓1過,點知真係撞到,嗱嗱聲帶佢過海,喺會所有啲樣衰嘢不表,入到去阿媽佢哋去咗第二邊嘅酒樓,仲俾我嗌點心,求其點啲囉....

 

早餐

剔咗點心先發覺有午市套餐好似仲抵

食物水非常平凡,除了這碟椒鹽豆腐,估唔到,會喺呢度食咗我認為全世界最好味嘅椒鹽豆腐

 飲完茶佢哋上寫字樓傾生意,我就返屋企休息吓,夜啲再出嚟
晚餐去尖東食,請客的是朋友,唔係傾生意嘅,呢位朋友全酒樓都叫佢大佬,唔係客套嗰隻,係有啲畏懼嗰隻,我對住佢都有啲怯,佢係幾有氣勢,食嘅係家常小茶,樣樣都好味,同尋日係天地之比

湯,正,飲咗五六碗

四個人食飯都包咗間大房,酒就得兩個人飲,肥佬飲少少其餘大佬隊哂

為肥佬而叫,俾佢間酒樓參考吓喎

蒸魚一流,魚頭我食哂

聽佢哋閒話家常,但都聽到頭痛,原來唔傾生意,普通傾計都係不停重覆,同,不停讚自己.

衝上雲霄

  請先按play
  人氣劇衝上雲霄2播完,可以講講關於套劇嘅嘢,好正常咁我係冇追睇,第一輯我都唔記得有冇睇(但報紙介紹劇情就肯定有睇,不嬲人氣高嘅劇我都睇呢啲介紹,當睇咗呱,第二輯都一樣),剩係記得你有睇同鍾意馬神,第二輯喺好偶然情況下總共睇咗十零分鐘,都係陳法拉,做得幾放吖,癲癲得得咁,吳鎮宇係我少數喜歡的演技派演員,喜歡他的神經刀,預計他做電視會交行貨(亦相信行貨都比好多人高),所以追看意欲不大......講咁耐返正題,衝上雲霄四個字一提起我都係只會諗起李察基爾齣舊戲,戲係麻麻,係隻歌好聽同結局係型,一句對白都冇,男主角喺人人睇死情況下出現喺冇人會估到嘅工廠,行去搵女角,抱起,車輪,抱住走人,乾淨痛快唔婆媽又型(當然李察基爾嘅步姿係型過籠,貓步咁係幾好笑,唔信搵嚟睇)......隻歌請play,港劇第二輯首歌俾人媽到暈,我都覺唔係幾好聽,撚聲得過份令我失笑,但,第一輯首歌我都係覺得唔好聽,寧願聽番beyond嗰首同名歌,講完.

孖 鹿鳴春

記得年頭去過三次鹿鳴春食飯,第一次好似係因為過年,第二次阿媽來了請客食飯,第三次唔記得為咩,剩係記得冇影到相,同衰公唔記得咗約咗食飯,我同屎忽鬼到咗先打俾佢佢飛的出嚟......

 

睇相請先打側個頭......唔知點解啲相會變哂打橫,又搞唔番直喎......

 

唔知乜春拼盤,得海哲好味

清炒蝦仁,好味

仲有碟蔥油餅,啱啱唔覺意刪咗,唔再整番,呢樹仲未識用,完全唔慣 

必叫,京燒羊肉

片皮鴨,健康咗唔夠肥,失色不少

大碟咗嘅拼盤,依舊

以下呢三張係第二次去食嗰陣影,因成圍枱好多人都唔識,影得少少......

翅,多人先叫得,精彩

甜品,剩係記得好味

寫到亂78糟,啲字周圍走,拼貼出呢篇視覺充滿後現代風格嘅......blog......要睇多啲高人教材先得