平安

**早幾日凍到甩肺我冇事,一回暖即病,病到今日都未好返......好似有舖節日就病嘅癮,再諗諗,我係潺仔成日都病撞正節日有幾咁奇呢?所以之前說法不成立.
**阿媽來了香港,今次住喺我屋企,同之前一樣,佢好多嘢會整/令到我好興,屎都滾,但本著與人為善,忍忍忍忍忍忍忍,先旨聲明唔係因為唔知算唔算有求於佢先忍,係衰公事件得到啟發,忍又何妨呢,肆無忌憚的句句有骨說話,丁蟹的性格,看不過眼的行徑,忍!!
**好好彩,尋晚夢見你,又係嗰種夢中三分醒嘅狀態,夢見我返工(?)放飯,就夠鐘之際鴞商場遇到你,夢入面時間緊迫,但又知道,非常清楚的告訴自己:嗱,唔好醒呀,醒就冇架啦,陪耐啲.......之後不了了之唔記得......

病慘了

**以前住近威爾斯,十幾年嚟只幫襯過一次咁大把(仲要係凌晨去/唔計撞車入院嗰次),以我病得咁頻密嚟講擺明係威記稀客,上週開始作病,前日終於要搵醫生睇睇,第一個想起的居然是威記,真係賤格.100蚊有5日藥抵到爛,唔係太多人之下等四粒鐘都唔係大問題(專注打機啫),係分流條友串串貢就係問題,後生細仔一路問一路un身un勢,我每一個答案你都搵位駁,每一句說話你就當耳邊風(從後來醫生嘅詢問得知),我話燒食退燒藥你問我燒到幾度我話唔知,你答:即係你以為發燒啦!!你係有你道理,我剩係想xx你,但我與人為善嘛......5日藥好似幾多,但有2隻我用唔著,剩番兩隻我食咗唔覺有效,我入x哂你數呀分流條四眼仔.

**城城半夜公開戀情,乜你真係咁滿意齣新戲咩?

**何家千金怒斬四年情,咪好囉,有機會識我嘞!!

**前日夢見你,說兩小時後和我結婚,一起去吃滷味(?),我獨自去文具店買禮物給你,你叮囑我睇住"筆直",百貨執笠,文具店喺四樓....(係好亂)

**漢堡王執,真係好可惜,和你唯一次去旅行在機場淶堡王發生了一件趣事你笑咗好耐,之後一起望穿秋水想佢開多啲分店,等到嘞,黃大仙都有埋添,去得嗰幾次就......

**尋晚夢見你,去我屋企袋好多嘢走,我有50張戲飛(pan偉送)俾咗30張你,去沙田ua......

**我記得你喺2005年11月七日病,又,2010/11的一月2十七日我又病......

小確幸

  上星期二起一連三日,我都夢見你,而且夢中故事是有發展,一晚之內醒過再翻瞓夢境又可以接得返,絕對是神奇!!第一晚重遇~曖昧~復合,第二晚旅行,第三晚上你家吃飯(以前是很重要的一件事),和你一起遭冷言冷語......尋晚(星期日)再夢見你,是你在學校主設計/佈置大堂,我見到你避走被你叫住,你說好久不見......又見到梳了賭神頭的衰公(現實中他後期還記得肥妹)和你拳對拳,我才首次和你說衰公的事,之後一路行一路閒聊,你接到電話講過不停,行錯路,我搭你膊頭行回正軌,完了,夢......我又回想起,和你分開第一年我生日,你很好的還和我到澳門慶生,離開時搭船回港,遇浪,我如常頭暈皺眉縮埋一舊,手自自然然拖實你,之後如果唔放手或許故事會不一樣.......當然,呢個如果就好似細蚊仔時考試唔讀書成績差,會話:我唔讀咋,讀就實考得好......真相是,你讀都未必考得好,留個幻想而已,這是垃圾,即是我.
  很怕傷春悲秋為愛為情恨似病無事呻吟,似足傻佬(我癲啫,唔係傻),講啲19嘢,睇廣告,見娜姐,想起fb見人捕穫佢,話長腿好靚云云......樣呢,見仁見智(不嬲唔覺佢靚),長腿,有絕對標準吧,明明腳短,著短褲/裙蘇出嚟就話長腿,唔係嘛,個廣告短短十幾秒唔講嗰種生硬法,又講腿,肉酸到呢,點j得落呀?

如果可以返轉頭

  我以前懶型講最討厭慚愧,後悔,點知家陣日日都......十年前呢個月嘅7號,我做咗一件不撚知所謂嘅錯/壞事,如果可以返轉頭,呢日會係我其中一個選擇(衰到咁嘅日子都有好多選擇,可想而知我有幾咁西),有時真係唔知點解我會咁都做得出......諗起中一嗰陣,學長臨別給我一張書簽,寫著:將你的聰明用於正途,你的收穫會更大.唔知點解會咁寫,因中一時我仲係唔多出聲,但事後睇番,又講得幾中,我個屎腦成日做啲無聊嘢,如大話,因為大話係冇發生過,係假的,人係會特別容易忘記,而我為咗圓大話,會記住佢,反而許下嘅諾言會忘得一乾二淨......另一單,你說我很恐怖,點解會有人講大話,作嘢,計算得咁精準,精準得恐怖......更契弟的是,連你發現我的大話也是我的計算之中......點解我唔正正經經似返個人?就算唔行正途又點解唔堂堂正正做人渣唔使而家咁窩囊廢?......呢排寫緊嘢,寫寫吓變成好似寫緊悔過書咁,如果係真係有排寫架陰公......

你好嗎?

我最喜歡的樂隊後期經成員商討決定不再作live演出,我最喜歡的主音就說這決定令他死了一半......四年前的828晚上,我已經死了......日復日日如是過,都唔知要做啲乜???.....等緊"true romance"入面嘅貓王,還是"我心狂野"入面嘅善良女巫,教教/救救我吧?!

乜都拗

  早輪我去完某國,由於唔係抱住旅遊心態去所以怨言會少咁啲,但絕對唔會冇,首先上次瀨過嘢肚痾(記錄1晚17次),今次小心飲食(但其實差唔多餐餐屋企食),一樣中招,好一啲係冇一晚去盡,分開嚟,一日去五六次,痾足六日,唯有當排毒囉......還有,喺我嘅少得可憐嘅外出時間入面,真係隨時隨地無時無刻都會俾我見到腳板底(係,不嬲我好x憎見到,除非遊水時),cafe,食河粉,去打邊爐,搭車,等車,個x個不分男女硬係用腳板底照耀我......一個無法無天嘅國家,我一落機,阿媽已喺禁區內等緊,隨行還有一機場人員,過關時唔使好似隔離咁排長龍(呀,以前去親仲要等好耐添,),出到有人幫手上落李搭車,原來只係俾咗少少錢機場人員......我發覺,原來阿媽講嘢十句我可以駁佢八句,歪理連篇,唔係x up就係錯哂,我與人為善,盡忍,當然,都有駁過火啦!!......呢8日7夜唔客易捱,最佳節目係日日去big c超市買吓嘢,收獲係即食麵,買咗十幾廿款試,試出有兩款好好味一款好味,當然唔會係河粉(喺嗰度食去舖頭食生牛河嘅河粉都唔得何況即食),以後有嘢買,唔使次次腰果,札肉(我唔飲咖啡).

**************************************************************************

  由細到大都唔鍾意影相(但鍾意影人),鏡都唔鍾意照(可能驕傲得滯),打扮更加求其(只要乾淨,講開,飯前洗手都俾阿媽串,我唔反擊仲得了?)喺某國肚痾時,坐底係對正塊鏡,有兩日wifi壞埋(?)唯有睇吓自己,發覺...真係幾老,面目全非咁,呢個係咪我嚟架?成頭白髮,眼又細咗好多,仲好似有少少射喱,雙下巴依舊(呢樣平時有留意開),又諗起以前一個唔起眼嘅舊同學而家俾人話勁靚仔,仲拍埋廣告,我無無聊聊忽然有少少火......已減肥一個月......

**************************************************************************

  電影我都唔鍾意夾硬湊成三部曲(太多例子,拍3集就話三部曲喎),何況容量更少嘅歌?近期洗板嗰三部曲,除十年前嗰首叫得上係合格嘅k歌,其餘兩首是不夠水準,合唱嗰首更是難聽,難道歌詞有少少橋(有咋,唔係好同有新意呀)就夠?阿y填詞當然好,我會將佢當做詞壇c朗,係勁,但,最大成就,只係能夠經常將佢同另一位相提並論!juno醉心電影,但電影都係算把啦,搞歌好啲,同周耀輝合作的作品咪幾好囉.

**************************************************************************

  早輪電視睇杜如風......只可以講,佢以前唔係咁(指早年乜行東京)......兩三年前聽佢電台頂十溝場,嘩!!!!!!!當然有貼切形容,但費事講,想講嘅係,當年睇乜行東京,邊睇邊寫筆記,準備和你去東京旅行(你好似唔知道),之後我衰爛賭,去旅行不了了之,當時我想將來還有機會,誰知......和你只去過一次旅行,是我人生憾事之一......如無意外,我都唔會去東京,有時甚至聽/看到關於東京旅行,心,是會痛的.

由閂折巧

  細個愛睇"壽星仔"漫畫,很記得一個章節"猶山節孝",唔係特別好笑而係講嘅嘢好匪夷所思,好荒謬(大個之後對同名電影和背後有了丁點認識是後話),估唔到,早輪我做了一件相似(我認為)的事,我和衰公去了某地方,他的成長地方,他將會在那裡定居.
  我全家人都好奇怪,唔正常就肯定,我和衰公關係......細個時人哋x我老母係冇乜反應,個母之轉做豆字就會開你拖(其實唔知點解,嗰陣(小學時)佢一年都係得一兩個月喺香港)......到了近年,對佢係恨之入骨,偏偏近呢一年我就辭職算係照顧佢,因為呢一年佢身體急劇退化,甚至患了老人痴呆......佢把口臭脾氣大,我都咁上下,所以經常嗌交,後來多數變成我鬧佢,因為瀨屎瀨尿,直到有次我鬧鬧吓佢有聲冇氣的答我:你鬧啦,之後,我接近冇再向過佢發脾氣(相反佢最錫嗰個就利害咯)......之後,佢身體再差,大阿哥,家姐,阿媽商量後說送佢去某地住阿媽屋企,請人照顧佢......呢度長篇囉......繼你離開後,再一次赤裸裸接受自己係幾咁冇用,冇錢冇能力喺香港照顧佢,要佢去阿媽度-去佢一世人最憎最痛恨嘅人屋企度住,還附送光環.如果佢仲有意識一定唔會肯(而家係冇),佢哋所謂恩怨......就算阿媽冇嘢,衰公都一定永遠同你死過,對大阿哥同家姐嚟講當然喺邊度都冇乜分別(廿幾年見得兩三次),而我日日對住衰公,完全知道佢係幾咁痛恨阿媽(我相信未患病前佢哋再遇係一定有血案)......都唔知講咗去邊,最後,而家衰公住喺嗰度,有工人和看護照顧,唔拉更嘅親戚大讚阿媽好嘢......最後我發現,原來我都唔係咁憎佢啫,臨別時(返香港)我很難過,不為其他.

p.s.諗番我的成長,衰公都好少出現,最記得係佢狂打我,同埋有次喺街撞到,佢帶我去八佰伴買咗部單車俾我.......大個啲,只要佢喺香港就日日車我返學......再大啲,差唔多日日遊車河,西貢的鹽焗雞腳,元朗飲茶,周圍買六合彩,呀,還有,好細個好細個時夜晚山長水遠帶我去觀塘食麵.

再p.s.我發現原來冇想像中咁憎衰公,曾懷疑:都就快四年啦,自己其實係咪真係咁掛念你?最後答案是絕對的,因為我相信眼淚不會說謊.

遺棄的聲音又響起了......

https://vimeo.com/14192175

  其實而家香港變到有地獄鬼國幾多成呢?咁多人泯滅人性?

  近排相當不如意,反而變番以前咁追美劇,wayward pines我諗冇咩人睇過,而家美國都好似做到第3集,追睇原因當然係心頭好明星(不是演員)麥迪倫主演(好似首演電視劇),喜歡麥迪倫由佢做青年人偶像開始(早過湯告魯斯出道少少),做咗幾十年戲真係冇乜進步(似足我哋華哥,不是姓劉是姓任那位),但一字記之曰:型.喺套劇入面已經年老色衰唔多有型,內容又故弄玄虛不知所謂,老實說睇落去係得閒,咁嘅劇睇介紹夠膽死同迷離劫(好消息相隔廿幾年終於有第三季,最重要係,繼續有大衛連治)拉上關係,唔計故事手法,剩係態度已相差幾班;另一套劇係一睇就連追兩季嘅House of Cards,話好睇又唔係,不過令人有追看意慾算係咁,從來唔喜歡kevin spacey(尤其討厭整色整水嘅非常嫌疑犯),但呢次做大奸狗偽君子又幾好睇(外地對佢呢次演出好似評價不高),導演有幾個名氣頗大如大衛芬查,祖舒密查,甚至茱迪科士打,芬查最大供獻相信是套劇畫面主調藍黃之爭,頗有趣.

  之前想過如果夢見你就寫一篇blog,殊不知夢見你的密度頗高,都唔知寫唔寫好......

即食麵.小鬼臉

美國食即食麵條鬼佬又嚟料,今次整夠兩個十大

http://hk.apple.nextmedia.com/international/art/20150423/19122268

http://hkm.appledaily.com/detail.php?guid=53682123&category_guid=10793140&category=instant&issue=20150428

港產十大,公仔我基本上只食雞蓉;出前一丁一時時,很難說最愛是誰,沙嗲五香牛肉麻油黑蒜油多一點,咖喱豬骨都唔少;福麵則大不如前,如要選最愛港產即食麵,我好老土,會整句平常盡量避免使用的"回憶是最好調味料"-中學時學校的餐肉麵(福麵),記得中學前我從未食過福麵,那時成日開唔到蓋的餐肉麵予我絕對是新大陸.
世界十大,百勝廚試過絕對名符其實,可惜貴咗啲,my kuali第1名買唔到,昨天剛試了蝦和白咖喱,蝦食過一次就算,白咖哩則可以長期追捧,雖然朕咖喱香我覺極似澳門神油-上等咖喱油.

p.s.昨晚夢見你,你向我作了一個招牌鬼臉-天知道我多麼多麼渴望可以再見到你對我整鬼臉......我很想很想再見,一次也好.

劉青雲不愧為劉青雲

  近來人人炒股,電視台喺呢個時候推大時代出嚟贈慶,丁蟹效應唔係嘢少,第1日就發功......都係講番大時代,當年推出普遍係劣評,收視也不濟,但好嘢經得起考驗(類似情況如阿飛正傳),現在是人人公認的神劇(個名好肉麻,但用住先),呢齣電視劇當然勁,係編劇的上好教材,個別場口我都睇過好幾十次,但,我係非常唔鍾意睇大時代,睇得太辛苦了,情節吓吓去到極端,有咁盡得咁盡(當然解嗰吓靚又正),人人歇斯底里,睇得太辛苦了,但如果同我講/討論劇情,我又可以唔停口有排吹(十溝場嗰幾集郭子健其實錯咗幾樣嘢)我係韋家輝迷,欣賞大時代但絕不喜歡(我記得你是很喜歡太時代的).
  今年有睇金像獎(同曼城平行睇),失禮+丟架錯不了,得體真係咁難?幽默真係咁難?亮點除了vee記上台攞獎,還有劉青雲,太空論予我簡直茅塞頓開五雷轟頂,我成日講唔出你何解這麼重要?為何是最特別,劉青雲不愧為劉青雲,藝術家不愧為藝術家(電影是第8藝術),可以將纏繞多年,我想極想不出所以的感覺/心聲,很具體,實實在在的說得明明白白,好嘢!!
  又講,我唔太鍾意睇劉青雲做戲,總覺欠了一點點...

癖好

  我有少少癖好(唔算怪嘅,應該),如幫啲嘢改/起名,又,我識嘅人,唔理熟定唔熟,可能會俾首歌佢,人歌合一,上面首歌~> https://www.youtube.com/watch?v=PIb6AZdTr-A (驚睇唔到,貼多次),以前聽覺得幾過癮,早排聽/睇番,就覺得同某blog友襯到咩咁(一樣咁癲癲得得),中段幾個女生跳舞更想起blog友和她的公子們一齊跳會幾好睇,還有,佢哋就快去旅行,送埋俾佢哋.順風

永遠之失敗

  以前一年裡頭最重要的一天,現在,昨天就這樣過了......還好的,是夢見你,更好的,是醒了,再瞓,接得番之前的夢,感恩.夢見你來我家煮嘢俾我食,還因為洗唔乾淨隻鑊而腼腆的笑起來,很掛念,還有失哂腔的笑,笑到真的流眼淚......

-

  唱得係冇問題,ok吖......講起嚟有少少尷尬,我係幾鍾意睇當年4葉草.
 
  26/1了,減肥第n次失敗,真係失敗.......要寫嘅禮物係1隻字都冇寫到,呢樣有點難於啟齒,我平時係懶到出汁,但呢次隻字冇顆唔係因為懶,係因為難堪,羞愧,悔疚......之後我會完成並送到你手.

  想約你食生日飯,有點點無恥出到我一個秘密,你都覆都冇覆.......活該

 

時光倒流70年s

  護照到期,雖然少用,但喺正樓下有得換唔係唔換吓嘩?換護照要新證件相,我第1時間想用番兩年幾前你陪我去影嗰輯,但去到職員一睇,先問幅相幾時影(@@哼)再話要俾電腦過目先知用唔用得(先進得佢吖),好彩,最後都用得,嚟緊嗰唔記得幾多年有幅有你的回憶的照片相伴總也不錯......講過幾次,不厭其煩再講多次,講多次拍照的故事:話說電影時光倒流70年入面,男主角在現代看見一幅古舊照片,為相中咀角含春(容我形容得賤格少少)的女主角傾倒著迷......輾轉之下跳到過去,攝影師為女主角拍照,男主角站在攝影師身後和女主角四相交投,女主角微微一笑~咔嚓~就是那幅照片了......我影證件相從來唔笑,仲興懶憂鬱鎖鎖眉,唯獨那次是喜形於色由心笑出嚟,因為你就在我面前......

不想-,只想+

  今日有件事值得一講(當然亦有一隻畜牲要屌,但日日狂屌都係便宜佢),就係部手機的芒貼終於堅持唔到落去,唔可以再用,其實半年前就應該要換(部手機壞壞哋都應該要換),但,係你幫我貼上去,部機係我哋一齊去買,有你幫我試機時影嘅相......芒貼一半俾風一吹就反,另一半夾雜空氣同塵,搭車我都唔係好敢拎出嚟......完